Энэ удаагийн дугаартаа Өмнөд Солонгосын залуу жүжигчин Вон Биний амьдрал, уран бүтээлийн талаар товч танилцуулж байна.
Солонгосын кино жүжигчин, загвар өмсөгч Вон Бин 1977 оны 11 дүгээр сарын 11-нд Өмнөд Солонгосын Гангвон-до мужийн Жеонсон хотод төрсөн байна. Залуу жүжигчин тэрбээр Зүүн болон Зүүн Өмнөд Азийн орны хамгийн алдартай кино жүжигчний нэг болжээ.
Амьдралын эхэн үе
Вон Бин таван хүүхэдтэй гэр бүлийн хамгийн отгон хүү нь болжээ. Тэрбээр дээрээ нэг ах, гурван эгчтэй аж. Түүний эцэг нь уурхайд, ээж нь фермд ажилладаг байв. Вон Бин уулархаг бүс нутагт аж төрдөг бусад хүүхдийн адил бага насаа өнгөрүүлжээ. Тэрбээр найзуудтайгаа хамт ойгоор зугаалж, голд сэлж, орой нар жаргахын өмнөхөн гэрийн бараа хардаг байжээ. Вон Бин багадаа бусад хөвгүүдийг бодвол илүү даруухан байсан ч энэ зан байдал нь өсч томорсон ч хэвээр ичимхий нэгэн байв. Тэрбээр нүүрэмгий нэгэн биш байсан ч спортод сайн байжээ. Вон Бин таеквондогоор хичээллэж, гуравдугаар зэргийн хар бүстэй аж. Өсвөр насандаа тэрбээр уралдааны автомашин, мотоцикл сонирхдог байсан учир анх автомашины засварчин болно гэж боддог байжээ. Үүний дараа Вон Бин механикийн ахлах сургуульд орж, автомашины механик, засварчны ангид суралцах болжээ.
1995 оны 11 дүгээр сард кабелийн телевиз шинэ жүжигчин шалгаруулж авна гэсэн зарын дагуу Вон Бин шалгалт өгч, шалгаруулалтад тэнцсэн байна. Тухайн үед тэрбээр ахлах сургуулийнхаа төгсөх ангид сурч байжээ.  Үүний дараа Вон Бин тус телевизийн жүжигчний ангид орж, телевизийн олон ангит хэд хэдэн  кинонд оролцсон байна. 1995 оны 12 дугаар сард тэрбээр мэргэжлийн жүжигчний агентлагтай гэрээ байгуулж, уран бүтээлчийн гараагаа эхэлжээ.
Уран бүтээлийн гараа
Вон Бин хамгийн анх 1997 онд «Санал тавих» гэдэг олон ангит кинонд туслах дүр бүтээн анх дэлгэцнээ гарчээ. 1998 онд бүтээсэн «Явахад бэлэн» кинонд тоглосон дүрээрээ Вон Бин урам зориг авч, тэрбээр Паекче урлагийн дээд сургуулийн жүжигчний ангид элсэн оржээ. 1999 онд тэрбээр кино урлагт эргэн ирж, «Квангки» олон ангит кинонд гол дүр бүтээсэн байна. Энэ уран бүтээлээрээ тэрбээр Солонгосын авъяаслаг залуу жүжигчин, охидын зүрх сэтгэлийг булаасан залуу болжээ.
Тэрбээр 2000 онд «Намрын дууль» /«Зүрхэнд шингэсэн намар» гэж монголын телевизүүдээр гарсан/ олон ангит кинонд бүтээсэн дүрээрээ ихээхэн амжилт олжээ. Вон Бин энэ кинонд бүтээсэн түргэн авиртай залуугийн дүрээрээ мэргэжилтнүүдэд жүжиглэх уран чадвараа харуулж чадснаас гадна түүнийг Солонгосын А жагсаалтын уран бүтээлч болгов. Үүнээс гадна энэ киногоороо Вон Бин Азийн алдартай залуу жүжигчин болжээ. 2002 онд Вон Бин Японы хамгийн алдартай анхны солонгос жүжигчин болсноос гадна Япон-Солонгосын хамтарсан анхны уран бүтээл «Найзууд» олон ангит кинонд тоглосон байна.
Тэрбээр мөн «Буу ба Яриа» «Миний ах» зэрэг үзэгчдийн сайн мэдэх уран бүтээлд дүр бүтээсэн юм.  Үүнээс гадна 2004 онд дэлгэцнээ гарсан хоёр Солонгосын дайны тухай «Дайны ах дүүс»/манай үзэгчид «Амьнаас илүү амь» гэсэн нэрээр сайн мэднэ/ кинонд бүтээсэн ахтайгаа хамт дайнд явсан залуугийн дүр Вон Биний нэр хүндийг олон улсын кино үзэгчдэд сайн таниулсан билээ. «Дайны ах дүүс» кино нь 2004 онд Солонгосын хамгийн ашиг орлоготой киногоор шалгарч байжээ.
Үүний дараа Вон Бин Өмнөд Солонгосын армид алба хаах үүргээ биелүүлэхээр 2005 онд уран бүтээлээ түр зогсоосон байна. Вон Бин 2005 оны 11 дүгээр сараас цэргийн алба хааж, 2006 оны зургадугаар сарын 2-нд биедээ гэмтэл авч, 2006 оны зургадугаар сарын 7-нд эрүүл мэндийн шалтгаанаар цэргээс халагджээ. Тэрбээр гэмтлээ бүрэн эдгээхийн тулд мэс засалд орж, жил гаруй хугацаатай эмчилгээ хийлгэж байжээ.
Вон Бин 2007 оны есдүгээр сарын 6-нд ЮНИСЕФ-ийн Солонгосын хорооны сайн үйлсийн элч болж, Өмнөд Солонгос улсад болсон хүүхдийн төлөө уриатай олон арга хэмжээнд оролцсон байна. Тэрбээр 2008 оны дөрөвдүгээр сараас уран бүтээлдээ эргэн орж, найруулагч Вон Жоон-хогийн «Ээж» кинонд тоглоно гэдгээ мэдэгджээ. Киноны зураг авалт 2008 оны есдүгээр сард эхэлж, 2009 оны хоёрдугаар сард дуусчээ. Тус кино нь 2009 оны Каннын кино наадамд өрсөлдсөхөөр сонгогдсон юм. 2009 оны тавдугаар сарын 16-нд Каннын наадмын үеэр нээлтээ хийсэн «Ээж» киноны улаан хивсний ёслолын ажиллагаанд Вон Бин оролцож байжээ. Тэрбээр одоо дахин шинэ уран бүтээл дээр ажиллахаар болж, 2009 оны 12 дугаар сараас «Энэ эрэгтэй» гэдэг киноны зураг авалтаа эхлэх аж.