Хамгийн намхан охин

Энэтхэгийн Нагпур хотын оршин суугч 15 настай Амге 5.25 кг жинтэй, 58.5 см өндөр. Бусад хүүхдийн адил сурч боловсорч байгаа өсвөр насны охин 1993 оны арванхоёрдугаар сарын 16-нд ердөө 136.8 грамм жинтэй төрсөн гэнэ. Эмч нар түүнийг нэг өдрөөс илүү амьдарч чадахгүй гэж байжээ. Энэтхэг охин тун муу алхдаг аж.



Ганц товчлууртай нөтбүүк

Дэлхийн хамгийн жижиг нөтбүүк "Мactini”-г шинийг эрэлхийлэгч Apple корпораци бүтээжээ. "Мactini” технологийн хөгжлийг нэг алхам урагшлуулсан бүтээл болж чадсан бөгөөд ердөө ганц товчлуураар нь бүхнийг удирддаг байна. "Компьютерийн гарны бүх үүргийг гүйцэтгэдэг. Та A үсэг бичихийг хүсвэл товчлуурыг нэг удаа, харин Z үсэг бичье гэвэл товчлуурыг 26 удаа дарна” гэж Apple-н төлөөлөгч мэдээлжээ. Шинэ нөтбүүкээр дуу сонсох, кино үзэх, бизнесийн төлөвлөлт хийх гэхчилэн бүхнийг гүйцэтгэх боломжтой.




Хамгийн жижиг гар буу

Энэ гар бууг хэтэрхий жижиг гэж битгий басаарай. Дэлхийн хамгийн жижиг гар бууны 2.34 мм голчтой байлдааны сум 432 км/ц-ийн хурдтай 112 метрийн тусгалтай. 5000 ам.долларын үнэтэй зарагдсан жижиг зэвсэг өдгөө эд зүйл цуглуулагчдын гарт очсон байна. Швейцарийн "Швейцарь-мини-ган” компани үйлдвэрлэдэг эл гар буу нь 3.6 грамм очир алмаазтай хувилбар 60 мянган ам.доллароор зарагдаж байжээ



Нарны эрчим хүчээр ажилладаг хамгийн жижиг машин

Нарны эрчим хүчээр ажилладаг хамгийн жижиг машин 3.3 x 2.2 x 1.4 см хэмжээтэй. Машин дээр байрлах хавтан нарны энерги шингээн, эрчим хүч үйлдвэрлэдэг байна. 22 ам.долларын үнэтэй уг машинаар гурваас доош насны хүүхэд тоглохыг хоригложээ.





Аавынхаа атганд багтсан хүү

Хятадын Өвөр Монголын иргэн Хэ Пинпин дэлхийн хамгийн намхан хүн. 74.61 см өндөр, 2009 онд Геннисийн номонд бичигдсэн тэрбээр 1988 оны долдугаар сарын 13-нд төржээ. Хэ Пинпиний хоёр эгч хэвийн өсөлттэй аж. Аавынхаа гарын атганд багтахаар жижигхэн төрсөн тэрбээр жирийн хүүхдээс удаан өсөлттэй ч алхаж чаддаг байсан гэнэ. Тамхи их татдаг Пинпин өнгөрөгч оны гуравдугаар сарын 13-нд өөд болжээ.




Хамгийн жижиг гутал

Хятадын Хонконгт дэлхийн хамгийн жижиг гутлыг урласнаа энэ оны нэгдүгээр сарын 20-нд олон нийтэд танилцуулжээ. Хурууны хумснаас хэд дахин жижиг гутал 3.8 мм урт, 1.8 мм өргөн, 2.2 мм өндөртэй. Ийм хэмжээтэй гутал нийтдээ 35 хосыг бүтээснийг Геннисийн номд хамгийн жижиг гуталаар тэмдэглэсэн байна.