Монголын рок попын урлаг "Киви”-гүй болж байна гэдгийг танд өнөөдөр дуулгая. Учир нь, Агий, Намуунаа хоёр албан

ёсоор хамтлагаа орхих шийдвэрийг гаргаж "Киви”-д Ука ганцаараа үлджээ. Одоогоос 7 жилийн өмнө буюу 2004 оны арванхоёрдугаар сарын 1-ний өдрөөс түүх нь эхлэх "Киви” хамтлаг өнгөрсөн хугацаанд олны анхаарлын төвд байж ирсэн.

Ер нь бол Монголын шинэ хөгжмийн урлагт хүчтэй байж чадсан эмэгтэй хамтлагийн тоо нэг гарын таван хуруунаас хэтрэхгүй. Шинээр гараад ирвэл тосоод авчихмаар цөөхүүлээ харагддаг ч, рок попын тогоонд аминчхан үзэл бөх бат бий гэдгийг дотор нь байдаг хүмүүс хэлдэг юм. Тэрчлэн, хэн хүссэн нь байр сууриа олж чадахгүй, ухарч, шантраад буцдаг рок попын тогоонд "Киви” хүчтэй байж чадсаны гол учир нь юу билээ? Шууд хэлэхэд, дуулах ур чадвараараа бус, өнгө зүс, имиж талаасаа тэд үнэхээр шинэ, сонин байж чадсан. Монгол төрх дээр бор, шар гадаад төрхүүдийг нэмж нэг цул болгож гаргаж ирсэн Б.Ангирмаагийн мэдрэмжийг үнэлэх хэрэгтэй. Тайвань, Хонгконг гэхчлэн шоу бизнес сайн хөгжсөн газруудад ийм холимог төрхтэй гишүүдтэй хамтлагууд байдаг ч, манай тухайд яах аргагүй содон байв. Түүнчлэн, "Киви”-гийн имижийг зөвхөн өөрийнхөөрөө шийдэж гарч ирсэн Б.Ангирмаагийн тухайд хамтлагийн продюсер хүн яаж ажиллах ёстой вэ гэдгийг үндсэн утгаар нь харуулсан гэхэд болно. "Киви”-г үнэтэй гэдгийг, далласан болгоныг дагаад гүйхгүй гэдгийг Б.Ангирмаа харуулсан. Гоё сайхан охидын хамтлагийг үнэлэх хэрэгтэй гэдгийг мэдрүүлж чадсан учраас, Киви Tiger-тай 90 саяын гэрээ хийж чадсан юм.

Тэрчлэн, "Киви”-гийн гишүүдийн үг яриа, үйл хөдлөл бүхнийг тэр зааж, зөвлөж ирсэн. Хамтлаг байгуулагдсанаас хойшхи эхний дөрвөн жилийн дотор ази царайтай гишүүнээ дөрвөн удаа сольсон. Т.Энхзолын тухайд "В" продакшны ивээл дор уран бvтээлээ хийхээр гарсан гэдэг ч, продюсерынхаа хатуу шаардлагын өмнө нугарсан гэдэг. Б.Халиунаагийн тухайд дуучин О.Анхбаяртай гэр бүл болж, хөл хүнд болсоноор гэрээгээ цуцалсан. Б.Солонгын тухайд ч тийм шалтгааны улмаас гэрээгээ цуцлахад хүрсэн юм. Харин хамтлагийн ахлагч Ука буюу Д.Уламбаяр, дуучин Ц.Намуунаа хоёр 7 жилийн турш "Киви”-гээр овоглолоо. "Nature Sound” –ыг хамтдаа төгссөн, гадаад төрхтэй энэ хоёр бүсгүйгүйгээр "Киви”-г төсөөлөхөд бэрх. Ази царайтай гишүүнээ дөрвөнтөө солиход "Киви” байж л байсан билээ. Харин өдгөө Агий дээр нь Намуунаа гарахаар "Киви” өмнөх шигээ олны анхааралд байж чадна гэдэг эргэлзээтэй. Гол нь, Ука одоо бүжигчин охидыг өөрөө шалгаж авч буй юм байна. Охидын гурвал хамтлагийн түүх ингээд төгсөж байгаа нь ойлгомжтой болж байгаа юм.

Ука цаашид бүжигчин охидтой баг бүрдүүлэх нь тодорхой ч, ямар нэртэй яадаг хамтлаг байх нь тодорхойгүй байна. Тэгэхээр "Хүслээ хэлнэ", "Гурван сэтгэл, нэг хүсэл", "Чамд амжилт хvсье" гэхчлэн цомгуудаа гаргаж, часхийсэн дуунуудаа клипжүүлж, Монгол орныг тойрон хэдэнтээ аялан тоглож, тэр хэрээрээ хөгжим сонирхогч, фенүүдээ баярлуулж явсан "Киви” ийнхүү тарлаа. Агий, Намуунаа хоёрт хамтлагаа орхих шийдвэрийг гаргахад тийм ч амар байгаагүй гэж байна. Гэсэн ч тэд хатуу, өндөр шаардлага дор хангалттай хугацаанд ажиллалаа гэж үзжээ. Тэрчлэн, олны анхаарлыг татсан олны танил хүмүүс болж чадсан гэдгээ ч тооцоолоо биз. Мөн хэн, хэн нь найз залуутайгаа амьдардаг гэхчлэн олон шалтгаан нөлөөлсөн биз. Уг нь, Агийгийн тухайд "ямар ч сайхан залуу, халуун хайраар хамтлагаа солихгүй" гэж 2 жилийн өмнө ярьж байсан юм. Тэгвэл тэр бодлыг нь цаг хугацаа ийн өөрчилжээ. Дашрамд дурдахад, тэднийг сүүлийн үед "Sweetymotion” –ы сүрд дарагдаад байна гэгдээд байсан ч Киви өөрийн орон зайгаа бий болгосон гэдгийг хэлэх хэрэгтэй юм. Өөр хэдэн бор, шар охидууд нийлээд, элдэв амттаны нэр өөрсөддөө өгөөд гарч ирлээ гэхэд, тэднийг Киви шиг хүлээж авахгүй нь үнэн юм. Тэгэхээр Киви эхлэл биш ч, бас жирийн өрнөл байсангүй. Ингээд хэлэхээр, айхтар гоц хоолойтой дуучид биш гэж өөлөх хүн гарах л байх. Гэсэн ч, дахиад хэлье. Киви ганц хувь. Киви хөгжим сонирхогч залуусыг үнэхээр байлдан дагуулж чадаж байсан гэдгийг эргэлзэхгүйгээр хэлье.